أسرار إنشاء محتوى كيبيع راسو فالمغرب

الصور كتلعب دور كبير فإقناع الناس، حيث العقل ديالنا كيتفاعل مع الصور أسرع من الكلام. ولكن ماشي أي صورة تخدم. خاص الصور تكون واضحة، زوينة، وكتحكي قصة.
مثلا، إيلا كتبيع منتجات تجميل، بدل ما تحط صورة ديال القارورة فوق طابلة، حط صورة “قبل وبعد” ديال النتيجة على الزبونة، أو فيديو قصير وهي كتستعمل المنتج.
كاينين أنواع ديال الصور اللي كيديرو مفعول السحر فالمحتوى:

-Lifestyl: الزبون كيشوف المنتوج كجزء من الحياة اليومية.
-Close-up: تركيز على التفاصيل باش تبان الجودة.
-Story photo: صورة كتخلّي المشاهد يكمّل القصة فدماغو. كل صورة خاصها تكون بجودة عالية، والإضاءة مزيانة، وحاول تدخل ألوان متناسقة مع البراند ديالك باش تخلي الناس يفتكروك بسهولة.

الصورة كتجذب العين، ولكن الكلمة كتقنع العقل. النصوص اللي كتصايبها خاصها تكون مختصرة ولكن قوية. السر هو تستعمل تقنيات الكتابة الإقناعية:

Storytelling: تحكي قصة قصيرة مرتبطة بالمنتوج.
الفائدة قبل الميزة: ما تقولش “هذا الحذاء مصنوع من الجلد”، قول “هذا الحذاء غادي يخليك تمشي ساعات بلا ما تحس بالتعب”.
خلق الفضول: استعمل جمل كيخلي القارئ يكمل القراءة، بحال “السر اللي ما كيعرفوش حتى المنافسين ديالك”.
ملي تكتب، تخيل راسك كتهضر مع شخص واحد، ماشي جمهور كامل، باش يحس القارئ أنك كتفهمه وكتخاطب مشاكله هو.

باش تصنع محتوى كيبيع راسو، ما كافيش غير تكون عندك صور زوينة أو نصوص معبرة بوحدهم. السر هو كيفاش كتدمجهم فرسالة وحدة متناسقة، كتشد الانتباه وتخلي الزبون يعيش تجربة المنتوج في خيالو قبل ما يشري.

الصورة كتشد العين بسرعة، خصوصاً إلا كانت واضحة ومعبرة، كتخلي الزبون يحس بالإحساس اللي بغيت توصله. مثلاً، صورة واحد كيشرب قهوة في شرفة مشمسة كتدي إحساس بالراحة والاسترخاء.

لكن الصورة بوحدها ما كتخدمش، خاصها تمشي مع نص مختصر وقوي كيشرح كيفاش المنتوج غادي يحسن حياة الزبون أو يحل مشكلو. بحال: “صباحك مع قهوتنا، لحظة هدوء تستحقها.”
هاد الدمج كيخلي القارئ يتخيل نفسو فهاد اللحظة ويزيد رغبته.

من بعد، من الأفضل تزيد دعوة ذكية للفعل (Call to Action) بلا ضغط، بحال: “جرب اليوم واستمتع  بالراحة.”

أيضاً، مهم توزع المحتوى على المنصات المناسبة: إنستغرام للصور والفيديوهات القصيرة، تيك توك للفيديوهات العملية، والمدونة للمقالات الطويلة. وخدم خطة نشر منتظمة باش تحافظ على التواصل مع جمهورك.

باش تحقق نجاح فالمحتوى ديالك، خاصك تبعد على أخطاء كثيرة كتخلي الناس ما يوقفوش عندك، أو حتى يخليوهم يهربو من المحتوى ديالك. هنا بعض الأخطاء الشائعة اللي خاصك تتفاداها بشدة:

-الصور بجودة ضعيفة أو غير واضحة
الصور الغير مهنية، مضيئة بزاف أو معتمة، كتخلي الجمهور يشك فالمصداقية ديالك. الناس كيبغيو يشوفو منتوج واضح وبجودة عالية، حيث حتى هادشي كيعكس الاحترافية ديالك.
-النصوص التقنية الباردة بلا إحساس
كتكتب وصف بارد بحال: “المنتوج مصنوع من البلاستيك عالي الجودة”. النص هذا ما كيشعلش رغبة، ما كيديرش علاقة مع القارئ. خاص النص يكون قريب من القلب، يشرح شنو غادي يحس به الزبون، مشي غير شنو فيه المنتوج.
-تكرار كلمات الطلب المباشر “شري دابا” بزاف
هاد العبارة ولات مملة وكثر منها كيخلي الزبون يحس بالضغط ويرفض يتفاعل. استعمل إيحاءات وعبارات ناعمة كتخلي القرار يرجع ليه.
-غياب التناسق بين الصور والنصوص
كيوقع يكون عندك صور زوينة، ولكن النص ما كيتماشىش معاها، أو العكس. هادشي كيخلي الرسالة مشوشة وماتوصلش بحالها.
-عدم وجود دعوة واضحة للفعل (Call to Action)
حتى إلا كان المحتوى زوين، بلا CTA واضحة فالآخر، الزبون ما غاديش يعرف الخطوة التالية. خاص تكون عارف شنو بغيت من القارئ يدير، وتوصله بطريقة بسيطة.
-المحتوى غير منتظم أو منقطع
اللي كينشر محتوى مرة مرة، بلا خطة ولا تنظيم، كيبني ثقة قليلة. الاستمرارية مهمة باش تبني علاقة قوية مع الجمهور ديالك.بتفادي هاد الأخطاء، كتضمن أن المحتوى ديالك يبقى قوي، مؤثر، وكيبيع راسو بكل سهولة.